Atburðarrás síðustu daga hefur verið hröð og sér ekki fyrir endann á afleiðingum COVID-19 veirunnar á samfélagið og heiminn allan.
Íþróttahreyfingin hefur staðið frammi fyrir erfiðum ákvörðunum og miklum áskorunum og staðið sig vel í þeim aðstæðum sem hún hefur staðið andspænis.

Í dag funduðu formaður UMFG og Auður, framkvæmdastjóri UMFÍ, með fulltrúum mennta- og menningarmálaráðuneytis og í kjölfarið með sérsamböndum ÍSÍ til að fara yfir stöðuna eftir birtingu auglýsinga heilbrigðisráðherra um samkomubann og takmarkanir á skólahaldi.
Báðar þessar auglýsingar hafa bein áhrif á starf UMFG.

Ljóst er að ýmislegt er enn óskýrt og mun helgin fara í skoða og reyna að fá skýra mynd af því hvaða áhrif þessar nýju reglur hafa á íþróttastarfið í landinu.

Samkomubann og takmarkanir á skóla- og íþróttastarfi taka gildi kl. 00:01 16. mars nk.

Á meðan mun UMFG gera sitt allra besta við að fylgja fyrirmælum yfirvalda varðandi fyrirbyggjandi aðgerðir og hreinlæti.

Hér eru slóðir á upplýsingasíður vegna COVID-19.  Síðurnar eru uppfærðar um leið og eitthvað nýtt fellur til í málinu.

Endilega kynnið ykkur vel það efni sem þarna er að finna.
https://www.landlaeknir.is/koronaveira/
https://www.covid.is/

Stjórn UMFG hefur í samráði við deildir ákveðið að æfingar verða um helgina eins og áætlað var, en hlutirnir geta breyst hratt og geta æfingar fallið niður fyrirvaralaust. Staðan verður metin um helgina og stöðufundur verður á sunnudaginn þar sem nánari fyrirmæli verða ákveðin.