Grindavík hafa samið við bandaríska bakvörðinn EC Matthews og mun hann leika með félaginu það sem eftir lifir leiktíðar. Matthews er 26 ára og lék síðast með Oliveirense í portúgölsku deildinni á tímabilinu 2020-2021. Þar var hann með tæp 16 stig að meðaltali í leik í þessari sterku deild.

Matthews er 196 cm á hæð og lék með Rhode Island háskólanum á árunum 2013-2018. Hann lék einnig tvö tímabil í NBA G-deildinni þar sem hann lék með Raptors 905 og einnig Erie Bayhawks.

EC átti upphaflega að ganga til liðs við Grindavík í upphafi októbermánaðar en varð þá fyrir lítilsháttar meiðslum sem hélt honum frá keppni í 3 vikur. Hann er búinn að ná sér að fullu og standa vonir til við að hann muni styrkja lið Grindavíkur í baráttunni í Subwaydeildinni. EC er væntanlegur til landsins um helgina.

Koma EC Matthews til Grindavíkur þýðir að Travis Atson mun hverfa á braut. Við hjá Grindavík viljum koma á framfæri kærum þökkum til Travis fyrir hans framlag til liðsins. Atson lagði sig allan fram, á mikið hrós skilið og skilaði góðu framlagi fyrir félagið í þremur góðum sigurleikjum. Travis mun dvelja áfram í Grindavík næstu daga á meðan hann finnur sér nýtt lið til að leika með.

Grindavík býður EC Matthews velkominn til félagsins og væntum við mikils af komu hans til Grindavíkur!