Grindavík tryggði sér tveggja stiga forystu í 1.deild karla með 2-1 sigri á Þrótti í gær.  Mörk Grindavíkur skoruðu heimamennirnir Óli Baldur Bjarnason og Daníel Leó Grétarsson.

Þróttur hafði fyrir leikinn verið á ágætis siglingu eftir að þeir skiptu um þjálfara.  Baráttan um sæti í efstu deild orðin hörð og því nauðsynlegt fyrir Grindavík að ná þremur stigum í gær.

Gestirnir vörðust vel framan af leik, sátu þétt aftur og erfitt að brjóta vegginn.  Grindavík komst þó í nokkur ágæt færi en inn vildi boltinn ekki.  

Á 41. mínútu skölluðu Þróttarar í slá og Andri Björn Sigurðsson var fyrstu til að ná til boltans eftir það og kom boltanum í netið.  1-0 í hálfleik sem var gegn gangi leiksins.

Það kom nokkuð á óvart að Þróttarar færðu sig aðeins framar á völlinn í seinni hálfleik þó að þeir kæmu inn í seinni hálfleikinn einu marki yfir.  Það virtist hinsvegar virka því þeir áttu skot í slánna fljótlega.  

Grindvíkingar áttu hinsvegar næsta mark.  Þá átti Jóhann Helgason skot í slánna á 51. mínútu og náði Óli Baldur frákastinu og þrumaði boltanum í markið, 1-1.

Strax tveimur mínútum seinna kom Daníel Leó Grétarsson okkar mönnum yfir eftir að Trausti Sigurbjörnsson varði stórglæsilega skot frá Juraj Grizelj og Daníel Leó fylgdi eftir.

Eftir það hægðist á leiknum og voru lokamínúturnar lengi að líða.

Maður hefur oft séð Grindavíkurliðið spila betur og vantaði smá neista í liðið en liðið tryggði sér öll stigin með baráttu og er það gott veganesti inn í Leiknisleikinn sem fer fram næsta laugardag. 

Alen Sutej spilaði ekki með Grindavíkurliðinu í gær og fór hinn hafsentinn, Markó Valdimar Stefánsson, út af í hálfleik.  Daníel Leó og Matthías Örn Friðriksson stóðu sig hinsvegar vel í öftustu röð í þeirra stað.

Staðan eftir 17 umferðir er því svona: