Ungmennafélag Grindavíkur

Stórleikur á Grindavíkurvelli í kvöld, ákall frá Stinningskalda
Stórleikur á Grindavíkurvelli í kvöld, ákall frá Stinningskalda

Það verður risastór grannaslagur á Grindavíkurvelli í kvöld þegar nágrannar okkar í Keflavík koma í heimsókn. Leikurinn er nánast upp á líf og dauða fyrir bæði lið, en Grindavík er 1 stigi frá toppnum í öðru sæti og Keflavík kemur svo strax á hæla okkar með þremur stigum minna.  Leikurinn er því afar mikilvægur fyrir okkar menn og hvetjum við Grindvíkinga til að fjölmenna á völlinn en leikurinn hefst kl. 19:15. 

Stinningskaldi kallar einnig á stuðningsmenn:

„Nú er dauðafæri fyrir okkur að nálgast betur deildina sem við eigum heima í! Drögum sem flesta á þennan leik og mætum öll í gulu/bláu og styðjum okkar lið. Setjumst þétt saman, ekki fara í ystu hluta stúkunnar. Þetta er ekki bara dauðafæri fyrir okkur, þetta er GRANNASLAGUR líka!! Þeir tóku okkur síðast á tveimur klaufamörkum sem við gáfum þeim en það verður ekkert slíkt í boði núna!

Við vonumst til þess að sjá yngri flokkana á leiknum í gulum búningum og biðlum við líka til mfl kvenna sem eru að standa sig feikivel að mæta allar í gulu. Árið 2016 skal verða ár fótboltaliðanna okkar í mfl. karla og kvenna!

Stinningskaldi mætir um klst fyrir leik í Gula húsinu eins og ávallt og eru allir stuðningsmenn Grindavíkur velkomnir þangað. Óli Stefán hefur verið að koma og kynna okkur uppstillingu og áætlun í þeim leikjum sem við höfum verið að spila um hálftíma fyrir leik svo við hvetjum ykkur til að vera mætt fyrir þann tíma.

Fjölmennum á þennan mikilvæga leik og látum í okkur heyra! ÁFRAM GRINDAVÍK!!“