Leiksins verður ekki minnst fyrir mikil sóknargæði en þessi lið hafa í gegnum tíðina fyrir þekktari fyrir þá hlið körfuknattleiksins heldur en varnarleikinn.  Í kvöld voru það þó varnirnar sem réðu ríkjum og höfðum við betur í þeirri baráttu og unnum að lokum mjög mikilvægan sigur.   
Flake var frábær í kvöld og var óstöðvandi fyrstu 3 fjórðungana en þá var hann held ég kominn með þau 29 stig sem hann endaði með.  Hann var 1 skitnu frákasti frá tvöfaldri tvennu og nýtti öll 11 vítaskot sín sem er frábært.  Keflvíkingar réðu nákvæmlega ekkert við hann.  Ómar var enn og aftur með tvennu, skoraði 12 stig og tók 10 fráköst en auk þess varði hann 3 skot, þar af 1 glæsilega undir lok leiksins sem fékk alla Grindvíkinga til að rísa úr sætum sínum.  Lalli var sömuleiðis með flottan leik, 11 stig, 9 fráköst og 4 stoðsendingar og þristurinn Gulli skilaði 10+ í framlagi með sínum 9 stigum, 6 fráköstum og 5 stoðsendingum.  Gulli hitti reyndar ekki nema 3/11 3-stiga skotum sínum en mörg skotanna dönsuðu trylltan stríðsdans á hringnum!!

Auðvitað hefðum við vilja vinna leikinn stærra til að öðlast betri innbyrðisstöðu gegn Keflvíkingum en ennþá er ómögulegt að spá fyrir um lokaniðurröðun í deildinni.  Okkur varð að ósk okkar varðandi Tindastólssigur því Stólarnir unnu Snæfell á heimavelli, 99-91 og ef við skoðum stöðuna í deildinni eftir þá leiki sem búnir eru í þessari umferð og setjum dæmið upp bæði m.v. Stjörnusigur og Njarðvíkursigur á morgun, þá er þetta útkoman skv. mínum kokkabókum.
Njarðvíkursigur
KR                        3 töp
Njarðvík              5 töp     67% vinningshlutfall á móti okkur og Keflavík
Grindavík            5 töp     50% vinningshlutfall á móti Njarðvík og Keflavík
Keflavík               5 töp     33% vinningshlutfall á móti okkur og Njarðvík
Snæfell               6 töp     Betri innbyrðisstaða gegn Stjörnunni
Stjarnan             6 töp     Verri innbyrðisstaða gegn Snæfelli

Þessar pælingar mínar eru auðvitað bara til gamans gerðar og veit ég ekki hvað spekúlantar KKÍ myndu segja við þeim en auðvitað skekkir þessa mynd að liðin eru búin að leika mismarga leiki á móti hvort öðru.  Og auðvitað þarf ekkert að taka fram að það skiptir nákvæmlega engu máli hvernig staðan í deildinni er núna þegar 3 umferðir eru eftir óleiknar og m.v. hvað margir innbyrðisleikir eiga eftir að fara fram eru talsvert miklar líkur á að lokastaðan eigi eftir að breytast eitthvað.  Svona líta lokaumferðirnar út:

20.umferð
Fsu – Tindastóll
Keflavík – Njarðvík
Breiðablik – Hamar
Snæfell – Grindavík
Stjarnan – KR
Fjölnir – ÍR

Þessi umferð er náttúrulega svakaleg!!  Öll 6 toppliðin að mætast og einnig mikilvægir leikir varðandi síðustu sæti inn í úrslitakeppnina og fallbaráttuna.

21.umferð
Hamar – Stjarnan
Njarðvík – Snæfell
Breiðablik – Fjölnir
KR – Keflavík
Grindavík – Fsu
Tindastóll – ÍR

2 risaleikir í þessari umferð!!

22.umferð
ÍR – Grindavík
Fsu  - Njarðvík
Snæfell – KR
Keflavík – Hamar
Stjarnan – Breiðablik
Fjölnir – Tindastóll.

KR með 3.leikinn í röð gegn einum af topp 6 liðunum.....  

Auðvitað þurfa öll liðin að hugsa um sig sjálf og einbeita sér að því að vinna sína leiki en af toppliðunum 6 má segja að við séum fyrirfram með auðveldasta prógrammið því við þurfum bara að mæta 1 af toppliðunum og KR-ingar og Snæfellingar eiga erfiðustu prógrömmin því lokaumferðirnar 3 eru allar á móti topp 6 liðum.  Stjarnan, Keflavík og Njarðvík þurfa 2x í lokaumferðunum  að kljást við slíkan andstæðing. 

Það er hægt að fara í endalausa hringi með þessar pælingar og eru þær auðvitað eingöngu til gamans gerðar eins og áður hefur komið fram.  Við Grindvíkingar höfum bara hið fornkveðna áfram í huga, að taka fyrir einn leik í einu og næst er svo sannarlega um enn einn stórleikinn að ræða, á móti Snæfelli á útivelli!  Kærkomið tækifæri eftir bikarvonbrigðin að sýna þeim bæði hvar Davíð keypti ölið og í tvo heimana og að lokum að launa þeim lambið gráa!!

Áfram Grindavík!!